വടക്കുകിഴക്കേയിന്ത്യയിലെ
ഹിമാലയന്‍ മേഖലയില്‍നിന്ന് പുതിയ പക്ഷിയിനത്തെ ഗവേഷകര്‍ തിരിച്ചറിഞ്ഞു.
'ഹിമാലയന്‍ ഫോറസ്റ്റ് ത്രഷ്' ( Himalayan Forest Thrush ) എന്ന പക്ഷി പുതിയ
ഇനമാണെന്ന് സൂചന നല്‍കിയത് അതിന്റെ ശബ്ദത്തിലെ വ്യത്യാസമാണ്.
ഇന്ത്യയ്ക്ക്
സ്വാതന്ത്ര്യം കിട്ടിയതിന് ശേഷം രാജ്യത്ത് തിരിച്ചറിയുന്ന നാലാമത്തെ
പക്ഷിയിനമാണിത്. പ്രശസ്ത പക്ഷിഗവേഷകന്‍ സാലിം അലിയുടെ പേരിലുള്ള
ശാസ്ത്രനാമമാണ് അതിന് നല്‍കിയത് - 'സൂത്തെറ സാലിമലീ' ( Zoothera salimalii )
എന്ന്.
സ്വീഡനില്‍ ഉപ്‌സല സര്‍വകലാശാലയില്‍ നിന്നുള്ള ഡോ.പെര്‍
ആല്‍സ്‌ട്രോം, ബെംഗളൂരുവില്‍ വൈല്‍ഡ്‌ലൈഫ് ബയോളജി ആന്‍ഡ് കണ്‍സര്‍വേഷനിലെ
മുംബൈ സ്വദേശിയായ ശശാങ്ക് ഡെല്‍വി എന്നിവരാണ് പുതിയ പക്ഷിയെ
തിരിച്ചറിഞ്ഞത്.
ഇത്രകാലവും 'പ്ലെയ്ന്‍-ബാക്ക്ഡ് ത്രഷ്' ( Plain-backed Thrush )
എന്ന പക്ഷികളുടെ കൂട്ടത്തില്‍പെട്ടവയായി ഹിമാലയന്‍ ഫോറസ്റ്റ് ത്രഷ്
പക്ഷികളും തെറ്റിദ്ധരിക്കപ്പെട്ടു. എന്നാല്‍, ഹിമാലയന്‍ ഫോറസ്റ്റ്
ത്രഷുകളുടെ ശബ്ദം വ്യത്യസ്തമാണെന്ന് തിരിച്ചറിഞ്ഞതാണ്, ആല്‍സ്‌ട്രോമിനെയും
ഡെല്‍വിയെയും ഇപ്പോഴത്തെ കണ്ടെത്തലിലേക്ക് നയിച്ചത്. ഹിമാലയന്‍ ഫോറസ്റ്റ് ത്രഷ് ( സൂത്തെറ സാലിമലീ). ചിത്രം കടപ്പാട്: Craig Belsfordരണ്ട് വിഭാഗം പക്ഷികളുടെയും പാട്ടുകള്‍ റിക്കോര്‍ഡ് ചെയ്ത്
താരതമ്യം ചെയ്തപ്പോള്‍, അവ തമ്മില്‍ ശരിക്കും വ്യത്യാസമുണ്ടെന്ന് ഗവേഷകര്‍
കണ്ടു. അതെത്തുടര്‍ന്ന് കൂടുതല്‍ നിരീക്ഷണം നടത്തിയപ്പോള്‍, ഹിമാലയന്‍
ഫോറസ്റ്റ് ത്രഷ് പക്ഷികളുടെ ആവാസവ്യവസ്ഥയിലും വ്യത്യാസമുള്ളതായി മനസിലായി.
ഈ
നിരീക്ഷണങ്ങളുടെ അടുത്ത പടി എന്ന നിലയ്ക്ക് യു.എസ്, ബ്രിട്ടണ്‍, ചൈന
എന്നിങ്ങനെ 15 രാജ്യങ്ങളിലെ മ്യൂസിയങ്ങളില്‍ സൂക്ഷിച്ചിട്ടുള്ള
സ്‌പെസിമിനുകള്‍ പരിശോധിച്ചു. ഇരുവിഭാഗം പക്ഷികളുടെയും തൂവല്‍ശ്രേണിയിലും
ശരീരഘടനയിലും വ്യത്യാമുള്ളതായി പരിശോധനയില്‍ തെളിഞ്ഞു. പുതിയ പക്ഷിയിനത്തെ കണ്ടെത്തിയ ഹിമാലയന്‍ പ്രദേശം. ചിത്രം കടപ്പാട്: Per Alströmകിഴക്കന്‍ ഹിമാലയന്‍ മേഖലയില്‍ കാണപ്പെടുന്ന ആ പക്ഷികള്‍ പുതിയ
ഇനമാണെന്നും അവയ്ക്ക് പേരില്ലെന്നും ഗവേഷകര്‍ക്ക് മനസിലായി. അങ്ങനെ ആ
ഇനത്തിന് ഹിമാലയന്‍ ഫോറസ്റ്റ് ത്രഷ് എന്ന് പേര് നല്‍കി. മാത്രമല്ല,
പ്ലെയ്ന്‍-ബാക്ക്ഡ് ത്രഷ് പക്ഷിയെ 'ആല്‍പൈന്‍ ത്രഷ്' ( Alpine Thrush )
എന്ന് പുനര്‍നാമകരണം ചെയ്യുകയും ചെയ്തു. 'ഏവിയന്‍ റിസര്‍ച്ച്' ജേര്‍ണലിലാണ് പുതിയ പക്ഷിയനത്തെ സംബന്ധിച്ച ഗവേഷണ റിപ്പോര്‍ട്ട് പ്രസിദ്ധീകരിച്ചത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ