കരയില്‍നിന്ന് ഇതുവരെ കണ്ടെത്തിയതില്‍ ഏറ്റവും പഴക്കമുള്ള ഫോസിലാണിത്
കരയിലെ ജീവപരിണാമം: വിലപ്പെട്ട തെളിവായി 44 കോടി വര്‍ഷം പഴക്കമുള്ള കൂണ്‍ഫോസില്‍
കരയില്‍നിന്ന് ലഭിക്കുന്ന ഏറ്റവും പഴക്കമുള്ള ഫോസിലാണിത്
കരയില്‍ സസ്യങ്ങളും ജീവികളും പരിണമിക്കാന്‍ വഴിയൊരുക്കിയതെന്ന് കരുതുന്ന പ്രചീന ഫംഗസിന്റെ ഫോസില്‍ ഗവേഷകര്‍ തിരിച്ചറിഞ്ഞു. 44 കോടി വര്‍ഷം പഴക്കമുള്ള കൂണിന്റെ ഭാഗം, ഇതുവരെ കരയില്‍ കണ്ടെത്തിയ ഏറ്റവും പഴക്കമുള്ള ഫോസിലാണ്.'ടോര്‍റ്റോടുബസ്' ( Tortotubus ) എന്ന് പേരിട്ട കൂണിന്റെ ഫോസിലിന് തലമുടിനാരിന്റെയത്ര പോലും വലുപ്പമില്ല. കരയില്‍ സസ്യ, ജിവജാലങ്ങള്‍ വളരാനുള്ള അടിത്തറയിട്ടത് ഇത്തരം ഫംഗസുകളാണെന്ന് ഗവേഷകര്‍ കരുതുന്നു.
50-45 കോടി വര്‍ഷം മുമ്പുള്ള കാലം 'പാലിയോസോയിഗ് യുഗം' ( Palaeozoic era ) എന്നാണറിയപ്പെടുന്നത്. കടലില്‍നിന്ന് ജീവന്‍ കരയിലെത്തി പരിണമിക്കാന്‍ തുടങ്ങിയത് ഈ കാലഘട്ടത്തിലാണെന്ന് ശാസ്ത്രം കരുതുന്നു.
അതിന് പക്ഷേ ചില സാഹചര്യങ്ങള്‍ കരയില്‍ വേണ്ടിയിരുന്നു. സസ്യങ്ങള്‍ക്ക് വളരാന്‍ ഫലഭൂയിഷ്ഠമായ മേല്‍മണ്ണ് ആവശ്യമായിരുന്നു. ആ സസ്യങ്ങള്‍ ഭക്ഷണമാക്കി വേണമായിരുന്നു ജീവികള്‍ക്ക് നിലനില്‍ക്കാന്‍.
'കടലില്‍നിന്ന് ആദ്യജീവികള്‍ എത്തുംമുമ്പ് കര മുഴുവന്‍ കൂണുകള്‍ പോലുള്ള ഫംഗസുകള്‍ വളര്‍ന്നിരുന്നു എന്നതിന് തെളിവ് നല്‍കുന്നതാണ് ഈ ഫോസില്‍'- ഡോ. സ്മിത്ത് പറഞ്ഞു. 'കരയിലെ ജീവപരിണാമത്തിലെ ഒരു പ്രധാന വിടവ് നികത്തുന്നതാണിത്'.
സസ്യങ്ങള്‍ക്ക് വളരാന്‍ വേണ്ട മേല്‍മണ്ണിന്റെ രൂപീകരണത്തില്‍ ഒരു പ്രധാന ഘടകം നൈട്രജന്‍ ചംക്രമണം ( nitrogen cycle ) ആണ്. സസ്യങ്ങളുടെയും ജീവികളുടെയും ഭക്ഷ്യശൃംഖലയില്‍ ഇത് സുപ്രധാനമാണ്. നൈട്രജന്‍ ചംക്രമണം സാധ്യമാക്കി മണ്ണിനെ ഫലഭൂയിഷ്ഠമാക്കാന്‍ ആദ്യകാലത്ത് ഈ പ്രാചീന ഫംഗസുകളാണ് സഹായിച്ചതെന്ന് ഗവേഷകര്‍ കരുതുന്നു (കടപ്പാട്: The Mirror ).
© Copyright Mathrubhumi 2016. All rights reserved.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ